ഈ ക്ഷേത്രത്തിന്റെ സ്ഥാപനകാലത്തു ഇതിന്റെ ഊരാണ്മക്കാരായി എട്ടു ഇല്ലക്കാരുണ്ടായിരുന്നു. അതില്‍ പരമേശ്വരമംഗലം, തേവലശ്ശേരി തുടങ്ങി നാല് ഇല്ലങ്ങൾ അന്യം നിന്നുപോയി. ശേഷിച്ച നാലില്ലക്കാരും കൂടി യോജിച്ചു പുഞ്ചമണ്‍ ഇല്ലക്കാര്‍ക്കു കൂടി ഇവിടുത്തെ ഊരാണ്മ കൊടുത്തു. അങ്ങിനെ അഞ്ചു ഇല്ലക്കാരാണ് പെരുന്ന ക്ഷേത്രത്തിന്റെ ഊരാണ്മക്കാർ
- കുമാരമംഗലത്തു മന
- താമരശ്ശേരി ഇല്ലം
- ഇടമന ഇല്ലം
- പയമ്പ്ര ഇല്ലം
- പുഞ്ചമണ്‍ ഇല്ലം
പുഞ്ചമൺ ഇല്ലക്കാരെ പെരുന്ന ദേവസ്വം ഊരാണ്മക്കാരായി രേഖപ്പെടുത്തിയതിനും ഒരു ചരിത്രം ഉണ്ട് . പുഞ്ചമണ്‍ ഇല്ലക്കാര്‍ വലിയ മന്ത്രവാദികളും ചാത്തനെ സേവിക്കുന്നവരും ആയിരുന്നു. ഒരിക്കല്‍ പുഞ്ചമണ്‍ ഇല്ലത്തെ വലിയ തിരുമേനി തെക്കുംകൂര്‍ രാജാവിന്റെ കല്പനപ്രകാരം രാജകുടുംബത്തിന്റെ ശ്രേയസ്സിനുവേണ്ടി ഒരു വലിയ മാന്ത്രിക കര്‍മ്മം നടത്തി. രാജാവിനു സന്തോഷമായി. അദ്ദേഹം പുഞ്ചമണ്ണിന്‌ എന്താ വേണ്ടതു എന്നു ചോദിച്ചു. കാടമുറിയില്‍ ഒരില്ലം വേണമെന്നും പെരുന്ന ക്ഷേത്രത്തില്‍ ഊരാൺമ സ്ഥാനം വേണമെന്നും നമ്പൂതിരി അറിയിച്ചു.
രാജാവു ഇത് രണ്ടും സാധിച്ചുകൊടുത്തു. മാവേലിക്കരയില്‍ എറവങ്കര എന്ന സ്ഥലത്താണു പുഞ്ചമണ്‍ ഇപ്പോൾ ഉള്ളത്. കാടമുറിയില്‍ ഈ ഇല്ലം ഉണ്ടാകാനും അവര്‍ പെരുന്ന ക്ഷേത്ര ഉടമകളില്‍ ഉൾപ്പെടാനും കാരണം തെക്കുംകൂർ രാജാവാണ്.
ഊരാണ്മക്കാരായ അഞ്ചില്ലക്കാര്‍ക്കും തുല്യാവകാശമല്ല ഉള്ളത്.
- കുമാരമംഗലത്തു മനയിലേക്കു – മൂന്നു
- താമരശ്ശേരിക്കു – രണ്ടു
- ഇടമനയ്ക്കു – ഒന്നു
- പയമ്പ്രക്കു – ഒന്നു
- പുഞ്ചമണ്ണിനു – ഒന്നു
ഈ ക്രമത്തിലാണു ഊരാണ്മ അവകാശം. ഇതില്‍ത്തന്നെ ഇടമനയ്ക്കും കുമാരമംഗലത്തിനും ചില പ്രത്യേകാവകാശങ്ങളും ഉണ്ടായിരുന്നു, താമരശ്ശേരിക്കുണ്ടായിരുന്ന മൂന്നു സ്ഥാനങ്ങളിൽ ഒന്നാണു പുഞ്ചമണ്ണിനു രാജാവിന്റെ കല്പനപ്രകാരം കൊടുത്തത്.
പണ്ട് ഊരാണ്മക്കാർ ആണ്ടുതോറും വൃശ്ചികമാസത്തിലും മിഥുന മാസത്തിലും കാർത്തിക നാൾ പകല്‍ നാലുമണിക്കു തെക്കെവാതില്‍ മാടത്തില്‍ യോഗം കൂടും. അതിനുവേണ്ടി മൂത്തതു കാലേകൂട്ടി വിളക്കും പലകയും ഒരുക്കിവെക്കും. യോഗാനന്തരം എല്പാവരും മണ്ഡപത്തില്‍ വന്നു ഇരിക്കും. അവിടെ
വച്ചാണു ഒരു കൊല്ലത്തെ വരവു ചെലവു കണക്കുകൾ പിള്ള വായിക്കുന്നതു. പിന്നീടു പതിവനുസരിച്ച്‌ ക്രമാനുസരണം
- പെരുംതൃക്കോവില്‍ വാര്യര്‍ – അഞ്ചു പണം
- ആററുപുറത്തു കുറുപ്പ്‌ – അഞ്ചു പണം
- പിലാപ്പറ നായർ – നാലേമുക്കാല്‍ പണം
- പയ്യമ്പള്ളിൽ നായർ – രണ്ടര പണം
- കുംഭകോണത്തു മാരാർ – രണ്ടര പണം
- മൂലയില്‍ മാരാർ – രണ്ടര പണം
- പ്ലാവേലിൽ – രണ്ടര പണം
ഇങ്ങനെ മൊത്തം ഇരുപത്തിനാലേമുക്കാല്‍ പണം ഹാജരാക്കും. കുറേ കാലങ്ങൾക്കു ശേഷം മിഥുനമാസത്തില്‍ കാര്‍ത്തിക ദിവസം മാത്രം യോഗം കൂടിയാല്‍ മതി എന്നു നിശ്ചയിച്ചു. ആ കാർത്തിക മുതല്‍ അടുത്ത മിഥുനത്തിലെ കാര്‍ത്തിക വരെയാണ്‌ ഒരു സാമ്പത്തിക വര്‍ഷമായി കണക്കാക്കി വന്നിരുന്നത്. മേല്‍കാണിച്ച പേരുക്രമത്തിന് അനുസരിച്ചു ഓരോരുത്തരും ഓരോ കൊല്ലത്തെ ഭരണം നടത്തി വന്നു.